ඉක්මනින්ම උදරයේ මේද දහනය කරන්න උදෑසනට මේ දේවල් ටික කරන්න

හැඩති සිරුරකට අනිවාර්යෙන්ම උදරය ප්‍රදේශය සිහින්ව තබාගැනීම අනිවාර්යයි.  ඉඟ ප්‍රදේශය විශාල වීම නිසා හදව්ටැහැ රෝග අවදානම ඉහල යනවා වගේම දියවැඩියාව සහ පිළිකා වගේ රෝග තත්වයන් ඇති වෙන්න බලපාන්නත් පුළුවන්. ඒ වගේම උදරයේ මේදය අඩු කරගැනීමෙන් ලේ නහර වල ක්‍රියාකාරිත්වය වැඩි වෙනවා වගේම ගුණාත්මක නින්දක් ලබාගන්නත් උපකාරී වෙනවා. අන්තර්ජාලයේ සැරිසරනකොට ඔයාලටත් උදරයේ මේදය අඩු කරගන්න විවිධ ක්‍රම සහ උපක්‍රම සඳහන් ලිපි සහ වීඩියෝ විශාල ප්‍රමාණයක් හමු වෙලා ඇති. හැබැයි මේ බහුතරයක් අනුගමනය කරන්න ඉතාම අපහසුයි වගේම සමහර ක්‍රම මගින් අපේක්ෂිත තරම් ප්‍රතිපල ලැබෙන්නෙත් නැහැ. හැබැයි අපි මේ ලිපියෙන් කියන්න යන්නේ උදරයේ මේදය අඩු කරගැනීමට ඔයාලට කරන්න පුළුවන් සරල දේවල් කිහිපයක්. කොටින්ම මේ දේවල් උදෑසනට පුරුද්දක් විදිහට කරනවා නම් උදරයේ මේදය අඩු කරගෙන සෞඛ්‍ය තත්වය ඉහල නංවා ගන්නත් පුළුවන්. 

1. ධනාත්මක සිතිවිලි සහිතව අවදි වෙන්න 

ආතතිය නිසා කෝටිසෝල් එහෙමත් නැත්නම් ස්ට්‍රෙස් හෝමෝන් කියලා හඳුන්වන හෝමෝනය නිපදවීම වැඩි වෙලා උදරයේ මේදය තැම්පත් වීම වැඩි වෙන්න පුළුවන්. කෝටිසෝල් මට්ටම ඉහල යාමෙන් ආහාර රුචිය වැඩි වෙන්න සහ උදරයේ මේදය ගබඩා කරගැනීම ඉහල යනවා කියලා පර්යේෂණ මගින් හොයාගෙන තියෙනවා. ඒ වගේම ඉඟ ප්‍රදේශය විශාල පුද්ගලයන්ගේ ආතතිය නිසා කෝටිසෝල් ශ්‍රාවය වීම වඩාත් ඉහල අගයක් ගන්නවා කියලත් සඳහන් වෙනවා. මේ නිසා උදෑසනට ආතතිය නැති කරගන්න යෝගා ව්‍යායාම කිරීම භාවනා කිරීම වගේ දෙයක නිරත වෙන්න පුළුවන් නම් වඩාත් හොඳයි.

2. අවදි උන වහාම ජලය පානය කරන්න 

මේ උපදෙස නම් ගොඩක් දෙනා අහල තියෙනවට සැකයක් නෑ. අවදි උන ගමන් ජලය පානය කිරීම දවස පුරාම ඔබේ ශරීරය සජලව තියන්න වගේම උදරයේ මේදය දහනය කිරීමටත් උපකාරී වෙනවා. ශරීරයේ පරිවෘත්තිය ක්‍රියා වේගවත් කරල ලේසියෙන්ම කැලරි දහනය කරන්න මේ නිසා ශරීරයට පුළුවන් වෙනවා. ඒ වගේම ශරීරයේ විෂ සහ අපද්‍රවය ඉවත් කරන්නත් ජලයට පුළුවන්. මේ නිසා බඩ පිපිම අඩු වෙනවා. අවදි ගමන්ම වතුර බොන එක ටිකක් අපහසුයි වගේ නම් උණු වතුර එකකට ලෙමන් හෝ මී පැණි දාල පානය කරන්නත් ඔබට පුළුවන්.

3. උදෑසන ආහාර වේල මගහරින්න එපා 

උදේ ආහාරය තමයි දවසේ මුල්ම සහ වැදගත්ම ආහාර වේල වෙන්නේ. ඔබේ ශරීරයට සාමාන්‍ය පරිදි ක්‍රියා කිරීමට අවශ්‍ය ශක්තිය ලබා දීම සහ ශරීරයේ ග්ලුකෝස් මට්ටම ස්ථාවර කිරීම සිදු වෙන්නෙත් උදෑසන ආහාර වේල හරහා. උදෑසන ආහාරය මග හරිම ශරීරයේ පරිවෘත්තිය ක්‍රියාවලිය අවුල් කිරීමට සහ මේද දහනය කිරීම මන්දගාමී කිරීමට හේතු වෙනවා. ඒ වගේම පෝෂ්‍යදායි උදෑසන ආහාර වේලක් ලබාගැනීමෙන් ඔබට ආහාර ලබාගැනීමට ඇති ආශාව අඩු වෙන නිසා විටින් විට කුසගිනි ඇති වෙලා විවිධ අමතර ආහාරයන් ගැනීමට පෙළඹීමත් අවම වෙනවා.

4. ප්‍රෝටීන් බහුල උදෑසන ආහාර වේලක් ලබාගන්න 

පෝෂ්‍යදායි උදැසන ආහාරයක වටිනාකම අපි උඩදී කිව්වනේ.උදෑසන ආහාරය මග නොහැර ලබාගන්නවා වගේම එයට අවශ්‍ය තරම් ප්‍රෝටීන් එකතු කරගන්නත් අමතක කරන්න එපා. සාමාන්‍යයෙන් ශරීරයට ප්‍රෝටීන් ජීර්ණය කිරීමට කාබෝහයිඩ්‍රේට සහ මේදය ජීර්ණය කිරීමට ගත වෙනවට වඩා වැඩි වෙලාවක් ගත වෙනවා. මේ නිසා ප්‍රෝටීන් බහුල ආහාර වේලකින් පැය කිහිපයක් පුරාවට ඔබට කුසගිනි ඇති නොවී ඉන්න පුළුවන් වෙනවා. ඒ වගේම ආහාර රුචිය පාලනය කිරීමට සහ රුධිරයේ සීනි මට්ටම සමතුලිත කිරීමටත් එය උපකාරී වෙනවා. මාංශ පේශි වර්ධනය කරගගන්න ගමන් නිතරම කුසගිනි ඇති කරගන්නේ නැතුව ඉන්න නම් උදෑසන ආහාර වේලට ප්‍රෝටීන් ග්රෑම් 2ක් 30ක් වගේ ප්‍රමාණයක් එකතු කරගන්න ඕන. බිත්තර, යෝගට්,  නට් බටර්, කුකුල් මස් හෝ සොසේජස් වගේ ප්‍රෝටීන් බහුල ආහාර වලින් මේ ප්‍රමාණය පහසුවෙන්ම ලබාගන්න පුළුවන්.

5. කෝපි කෝප්පයක් පානය කරන්න 

මෙහෙම කිව්වට ඉතින් හැමෝම වගේ කෝපි වලට කැමති නැහැ. හැබැයි උදෑසනට කෝපි කෝප්පයක් පානය කිරීම නිසා ආහාර රුචිය අඩු වෙලා කැලරි ලබාගැනීම තාරක සීමා වෙනවා. ඒ වගේම කැෆෙන් වලට පරිවෘත්තිය ක්‍රියා වේගවත් කරල මේද දහනය වැඩි කරන්නත් හැකියාව තියෙනවා. හැබැයි අවශ්‍ය ප්‍රමාණය වඩා කැෆෙන් ලබාගැනීමෙන් විජලනය ඇති වෙන්නත් පුළුවන්.

6. උදැසන ආහාර වේලට ප්‍රොබයෝටික් එකතු කරගන්න 

ප්‍රොබයෝටික් කියන්නේ සමහර ආහාර වල අන්තර්ගත වෙන බැක්ටීරියාවක්. බඩවැල් වල සෞඛ්‍ය වර්ධනය වීම සහ ප්‍රතිශක්තිකරණ ක්‍රියාකාරිත්වය වැඩි දියුණු වීම වගේ සෞඛ්‍ය ප්‍රතිලාභ රාශියක් ප්‍රොබයෝටික් වලින් ලබාගන්න පුළුවන්. පර්යේෂණ වලට අනුව ශරීරයේ බර වැඩි වීම සමඟ බැක්ටීරියා ක්‍රියාකාරිත්වයේ සම්බන්ධයක් තියෙනවා කියලා හොයාගෙන තියෙනවා. ඒ වගේම නිවැරදිව බැක්ටීරියා සමතුලිතතාවයක් පවත්වාගැනීමෙන් උදරයේ මේදය අඩු කරගන්න පුළුවන් කියලත් කියනව. ඉතින් මේ සඳහා උපකාරී වෙන විශේෂිත බැක්ටීරියා කිහිපයක්ම තියෙනවා. ප්‍රොබයෝටික් ඒ අතරින් ප්‍රධාන තැනක් ගන්නවා මේ නිසා උදෑසන ආහාර වේලට ප්‍රොබයෝටික් අඩංගු ආහාර අතිරේකයක් එකතු කරගන්න පුළුවන් නම් හොඳයි.